Dagur tónlistarskólans

Dagur tónlistarskólans

og Hljómanótt

Tónlistarskólar landsins eru um 90 talsins og standa fyrir fjölbreyttu og öflugu skólastarfi. Hátíðisdagur þeirra, „Dagur tónlistarskólans“, er haldinn 7. febrúar ár hvert. Þann dag fæddist Gylfi Þ. Gíslason sem var menntamálaráðherra frá 1956-1971, en hann hefur gjarnan verið kallaður „faðir íslenskra tónlistarskóla“. Gylfi kom því í gegn á ráðherratíð sinni að sveitarfélög sem hefðu hug á því að stofna tónlistarskóla fengju til þess styrk úr ríkissjóði sem næmi 25% af launakostnaði. Síðar var hann aðal hvatamaðurinn að því að launaframlag ríkisins var aukið í 50% sem varð sveitarfélögum enn meiri hvatning til að stofna tónlistarskóla og þá fjölgaði þeim umtalsvert. Íslenskt tónlistarlíf og -menntun mun alla tíð búa að framsýni Gylfa Þ. Gíslasonar og áhuga hans á aukinni, markvissri tónlistarmenntun þjóðarinnar.

Í tilefni af Degi tónlistarskólanna hafa íslenskir tónlistarskólar efnt til ýmis konar viðburða og/eða kynninga í gegn um tíðina með það að markmiði að auka sýnileika og styrkja tengsl við nærsamfélagið. Tónlistarskólinn i Garði hefur ekki verið eftirbátur annarra í því og hefur alla tíð haldið þessum degi á lofti.

Föstudaginn 7. febrúar, á „Degi tónlistarskólans“, efna nokkrir tónlistarskólar á suðvesturhorninu, m.a. Tónlistarskólinn í Garði og Tónlistarskóli Reykjanesbæjar, til svokallaðrar Hljómanætur sem rytmískrar deildir skólanna standa fyrir. Að þessu sinni verður Hljómanótt haldin í Garðaskóla í Garðabæ. Þá sameinast nemendur og æfa saman í hljómsveitum undir handleiðslu kennara deildanna. Dagskrá Hljómanætur lýkur svo með tónleikum á miðnætti 7.febrúar. Sérstakir gestir verða Una Torfa og Sigrún Kristbjörg Jónsdóttir sem munu vinna sérstaklega með nemendum.